Sunday, October 28, 2012

ကစဉ့်ကလျားနိစ္စဓူဝများ

ဒီမနက်မှာ
အစောဆုံးနေရောင်ခြည်လို့လည်း မမည်တဲ့
နေရောင်တွေနဲ့  နိုးထခဲ့မယ်
ပြတင်းတခါးကနေ မကြည့်ဖြစ်ပေမယ့်
သိတယ်
ဒီကမ္ဘာမှာ  စက္ကန့်သိန်းပေါင်း ကိုးထောင်ခုနှစ်ရာခုနှစ်ဆယ့်ခြောက်ကြာအောင်
ဖြတ်သန်းခဲ့တာတောင်
ဒီမနက်တွေက ဒီအတိုင်းပဲ
ရာသီပေါ် နိစ္စဓူဝတွေ တွဲခိုကပ်ပါနေပုံ...................



ဖုန်းနားကြပ်တပ်ပြီး သီချင်းတစ်ပုဒ်နားထောင်လိုက်တယ်
run from prejudice .. run from pain တဲ့

ဒီလိုထွက်ပြေးရတာလည်း တဖြည်းဖြည်း နိစ္စဓူဝဆန်လာတဲ့အခါ
ပျော်ရွှင်မှုမှာ
နာကျင်မှုမှာ
ပြိုလဲမှုမှာ
ပြန်လည်ရှင်သန်မှုမှာ
ဝေခွဲမရမှုမှာ
သွေးအေးရက်စက်မှုမှာ
ပေါ့ပါးပေတေမှုမှာ
ရင်ကွဲပက်လက်ဖြစ်မှုတွေမှာ

နှလုံးသားက နိစ္စဓူဝဆန်စွာ
လက်ယဉ်ယဉ်နဲ့ ခုန်နေပုံ..........................


ဒီနေ့မှာ မနေ့ကနဲ့ မတူတာကတော့
၁) လေချွန်ပြီး သီချင်းတစ်ပုဒ်ငြီးချင်တယ်
၂) မေစပါယ်ညိုရဲ့ "ကြည်နူးခွင့်" ဆိုတဲ့ သီချင်းကို
အသေအချာတီးပြီးဆိုချင်တယ်
၃) ဂျင်းကုတ်နဲ့ အော်စတားဖိနပ်စီးပြီး ကြိုက်တဲ့ ၁၁ မျိုးသော အစားတွေထဲက တစ်ချို့ကို
လျှောက်စားချင်တယ်
 ၄) သူငယ်ချင်းတွေနဲ့ ပေါ့ပေါ့ပါးပါး ရီမောချင်တယ်


 အဲဒီလိုတွေးပေမယ့်
လေလည်းမချွန်တက်တာနဲ့
 ကွန်ပျူတာဖွင့်ပြီး
ပျင်းစရာကောင်းတဲ့ အစီရင်ခံစာတစ်စောင်ထိုင်ရေးလိုက်တဲ့အခါ
ဒီနေ့ဟာ မနေ့ကနဲ့ ထပ်တူကို တူသွားပြန်ခဲ့တယ် ................

ဘာဖြစ်ဖြစ်
မနက်ဖြန်ကိုတော့ သေချာမသိပါဘူး
မနေ့ကကိုလည်း သေချာသိခဲ့တာမှ မဟုတ်တာ
ဒီလိုတွေးမိသွားတော့
လူတစ်ယောက်ဆီ သတိတရ တယ်လီဖုန်း message တစ်စောင်ပို့လိုက်ပြန်တယ် ..................


"ဘာမှ မရှိတဲ့ပန်းတိုင်လည်း ပန်းတိုင်ပေါ့
အချိန်တွေကို ကျုပ်တို့မပိုင်ဘူးဗျ
ဒါပေမယ့် ကျူပ်တို့နှလုံးသားကိုတော့ ကျူပ်တို့ပိုင်တယ်
နှလုံးသားနဲ့ နာကြားဖြတ်သန်းကြမယ်လေ"

ကွန်ပျူတာဖန်သားပြင်ပေါ် ရေးရေးထင်နေတဲ့
ပုံရိပ်တစ်ခုက
တော်လှန်ရေးဆန်ဆန် ကြွေးကြော်နေတာမြင်ပြန်တော့

အားရပါးရ ရယ်မိလိုက်တယ် ......................။ 









Friday, June 22, 2012

မိမိကိုယ်ပေါ်ပြန်လှန်ရှာဖွေနေမိတဲ့ နောက်ဆုံးပေါ် ကုထုံး



ယုံကြည်မှုတွေပေးခဲ့တယ်

ယုံကြည်မှုပေးရင်း စစ်မှန်တဲ့ ယုံကြည်မှု ပြန်ရယူဖို့ တည်ဆောက်ယူနိုင်မယ်လို့

အားထည့်ယုံကြည်ခဲ့တယ် ။

ဖြူစင်မှုတွေရခဲ့ဖူးတယ်

ဒီလူတွေက အဲဒီလိုဖြူစင်မှုတွေ ပြခဲ့ဖူးလို့

ဖြူစင်နိုင်ဦးမှာပဲလို့

သံသယမဖြစ်ဘဲ ယုံကြည်ခဲ့တယ် ။

ရိုးသားမှုတွေရခဲ့တယ်

ရိုးသားတဲ့ဆက်ဆံမှုတစ်ခု ရခဲ့လို့

ရိုးသားမှုတွေ အဲဒီဝဲဘက်ရင်အုံလေးထောင့်မှာ

ခုအောင်းနေမှာပဲလို့

ရိုးရိုးသားသားတွေးခဲ့တယ် ။

ဟိုနေ့က .....

အဲဒီလူတွေ နောက်ကျောမှာ ၀ှက်ထားတဲ့ အသွားထက်ထက် ဓားတလက်လက်တွေ တွေ့ခဲ့တယ်

ဟိုနေ့က .....

အဲဒီလူတွေ ခိုးဝှက်ပြုံးခဲ့တဲ့  ကြောက်စရာ နှုတ်ခမ်းအတွန့်ချိုးတွေကို တွေ့ခဲ့တယ်

ဟိုနေ့က ......

အဲဒီလူတွေရဲ့

မီးခိုးရောင် သမိုင်းတွေကို တွေ့ခဲ့တယ်

ဟိုနေ့က ...

အဲဒီလူတွေရင်ထဲ နီညိုမှိုင်းမှိုင်း ဆန်းပြားတဲ့ စိတ်အရောင်ကောင်ကြောင်းတွေတွေ့ခဲ့တယ်

ဟိုနေ့က .....

အဲဒီလူတွေရဲ့ တခါမှ တွေ့ရမယ်မထင်ဖူးတဲ့ အရာတွေ ဆန်းပြားစွာ တွေ့ခဲ့တယ် ။

နောက်ဆုံး
 ယုံကြည်ခဲ့သူတွေနဲ့ မယုံခဲ့သူတွေကြား
 ကွဲပြားတဲ့အချက်အလက်ဆိုလို့ ဘာတစ်မှ ရှာဖွေဆွဲထုတ်လို့မရတော့တဲ့အခါ


အဲဒီနောက်ဆုံးပေါ် လမ်းပျောက်မှုဝေဒနာကို နှလုံးသွင်းဖို့

နောက်ဆုံးပေါ် ကုသနည်းတစ်ခုကို မိမိကိုယ်ပေါ် ပြန်ရှာတုန်း ...........................။



သောကြာနေ့






Sunday, May 20, 2012

အဓိပ္ပါယ်ဖွင့်ဆိုမှု ပျောက်ဆုံးနေနှင့်ပြီးသော


၁၃ နှစ်သားလေးရဲ့ ရင်ခုန်မှုမျိုး
ပြန်မရစကောင်းလားဆို
အဲဒီ ဘ၀ကို ကျိတ်မနိုင်ခဲမရမဖြစ်ပါနဲ့

ချစ်ခြင်းတရားရဲ့သန့်စင်မှုကို
.............. ကြိမ်မြောက်သော ပြိုလဲခြင်းမျိုးပြီးသောအခါ
သင်ယူတတ်မြောက်လာမယ်

အချစ်အကြောင်းပြောကြတဲ့ခါ
 ပြုံးနေချင်မယ် 

အချစ်က တည်ဆောက်မှ ရှိတဲ့အရာမဟုတ်ဘူး .......
စကားလုံးတွေနဲ့ သက်သေရှိရှိ မြင်သာထင်သာ
ကတိက၀တ်ပြုမှ ရှိနေတဲ့အရာမဟုတ်ဘူး.......
မျှော်လင့်ချက်ပန်းတိုင်ဆိုတာရှိမှ ဖြစ်တည်နေတဲ့အရာမဟုတ်ဘူး ........
နီးစပ်ထိတွေ့နေရမှ ဖြစ်တည်နေတဲ့အရာမဟုတ်ဘူး ......
တစ်ဖက်သတ်ပေးဆပ်နေရမှ ဖြစ်တည်နေတာလည်းမဟုတ်ဘူး .....
အချိန်ကြာလာတာနဲ့အမျှ ပြယ်လွင့်သွားမယ့်အရာမျိုးလည်းမဟုတ်ပြန်ဘူး ...........
လိမ်ညာလှည့်ဖျားမှုတွေထဲမှာလည်း တည်ရှိနေမယ့်အရာမျိုးမဟုတ်ဘူး ...........

အမှန်က အသက်ရှုခြင်းအနုပညာတစ်ရပ်လို
အဲဒီချစ်ခြင်းရှိနေမှန်းကို ကိုယ်တိုင်မေ့လျော့နေမယ့်အရာမျိုး .........

ဖမ်းဆုပ်သိမ်းပိုက်မိတဲ့အခါမှာလည်း ထာဝရပျက်ဆီးသွားနိုင်တဲ့ အရာမျိုးမို့............

ချစ်ခြင်းကို သဘာဝတရားတစ်ခုလို မြတ်နိုးနိုင်တဲ့အခါ သန့်စင်လာတယ်။             ။


တနင်္ဂနွေ

Saturday, May 5, 2012

ပုဂံမြို့ဟောင်းဆီမှ အသံများ

ထီးလိုမင်းလို ဘုရားဝန်းထဲက .. လေထဲလွင့်ပါးနေတဲ့ ဆည်းလည်းသံ ......ရုပ်သေးကြိုးဆွဲရုပ်ငယ်တွေ.... အလှချိတ်ဆွဲတဲ့ သစ်သားရုပ်ကလေးတွေ ... လွင့်ပါးနေတဲ့ သဲပန်းချီကားချပ်တွေ .. နောက် တည်တည်ခန့်ခန့် သစ်သား မျက်နှာဖုံးတွေ ပြီးတော့ ဈေးသည်တွေရဲ့ အသံတွေ ... အဲဒီ တစ်ဒင်္ဂမှာ အဲဒီအသံတွေအားလုံးက နှလုံးသားကို စကားတွေ အများကြီး လာပြောနေတယ် .....
 


 

 လောကနန္ဒာဘုရားကနေ ရှူရှိုက်ခဲ့ရတဲ့ ဧရာဝတီရဲ့ရနံ့ရယ်၊ ဧရာဝတီရဲ့လေတိုးသံ၊ ဟိုးအဝေးခပ်ပြပြက သဲမှုန်တိုင်းငယ်ငယ်၊ နောက် ငှက်ကလေးတွေရဲ့အသံ၊ ဘုရားအုတ်ပေါက်တွေကြားက လှမ်းမြင်နေတဲ့  မြတ်နိုးစရာကောင်းတဲ့ ကျွန်မတို့ရဲ့ဧရာဝတီ ....






ရွှေစည်းခုံဘုရားပေါ်မှာ မီးမပူဇော်ရသေးတဲ့အချိန် . မှောင်ပြပြ ညနေရီမှာ ကျေးငှက်တွေရဲ့အသံရယ်.. ဘုရားထဲလာ ကစားနေကြတဲ့...  ကလေးတွေရဲ့အသံရယ်.. ဘုရားကဆည်းလည်း သံတွေရယ် .....  နောက်ဘုရားစာရွတ်နေတဲ့ အဘိုးတစ်ယောက်အရဲ့အသံ .. ညနေခင်း ခပ်စိမ့်စိမ့်တိုက်နေတဲ့ လေညှင်း .. ဘာကိုမှန်းမသိဘူး ငြိမ်းငြိမ်းချမ်းချမ်းခံစားမှုတစ်မျိုးခံစားရတယ် .. အဲဒီခံစားမှုကိုလည်း မျှဝေချင်စိတ်တစ်မျိုးလည်း ကပ်ပါခံစားရတယ် ... 

အပြန်ကျတော့ ဘုရားဇောင်းတန်းတွေ မီးထွန်းထားပြီ.. ဘုရားဝန်းကျင်ကတော့ မှောင်မိုက်နေတုန်းပဲ.. ဘုရားဇောင်းတန်းထဲက ယိုဖိတ်ထွက်နေတဲ့ ၀ါကျင်ကျင် အလင်းရောင်က အနုပညာဆန်တယ် ..

 ဓမ္မယံကြီး ဘုရားဝန်းထဲမှာ တွေ့ခဲ့တဲ့ ကလေးလေးတွေ .......


အလှူခံနည်း အမျိုးမျိုး တွေ့ခဲ့ဖူးတယ် .. မင်းကွန်းတစ်ဖက်ကမ်းသွားတော့ လှေပေါ်က ဆင်းတာနဲ့ ကလေးငယ်တွေ ကပ်လိုက်လာပြီး အမွှေးတိုင်ယူပါ .. ဖယောင်းတိုင်ယူပါ နဲ့ အမှန်တော့ အလှူခံနည်းမျိုး မဆန်အောင် အမွှေးတိုင်ကို မယူမချင်း တောက်လျှောက်လိုက်ပြီး ဇွတ်လိုက်ရောင်းတဲ့ အလှူခံနည်းမျိုးကြုံဖူးတယ်..
နောက် .. သန်လျင်မှာ ကျောင်းတတ်တုန်းက ကိုရင်လေးတွေ အလှူခံတာ .. ကားပေါ်က ဆင်းပြီဆိုတာနဲ့ လမ်းကို ပိတ်ဆို့ထားပြီး အတင်းအလှူကို ထည့်စေတယ်.. မထည့်ဘဲ ဇွတ်ထွက်သွားရင် နောက်ကနေ ဖိနပ်ကို နင်းထားပြီး "ဒကာမကြီး အလှူခံပါတယ်" လို့ မပြတ်ပြောနေတဲ့ အလှူခံခြင်းမျိူးလည်း ကြုံဖူးတယ်။ ကိုရင်လေးတွေ နစ္စဒူဝ ဒါမျိုးကြီးလုပ်နေတော့ နောက်ပိုင်း သူတို့လက်က လွတ်အောင် ဇောချွေးပြန်မတတ် ထွက်ပြေးခဲ့ရဖူးတယ် ...
နောက် လမ်းတွေမှာ ခရီးသွားဟန်လွှဲ ကားခမကျန်တော့လို့ ကားခလေး လှူပါဆို .. မကြာခဏကြုံရတတ်တဲ့ အလှူခံခြင်းမျိုး.. အဲဒီ ကားခမကျန်တဲ့လူကိုပဲ ခဏခဏ ကားခမကျန်တဲ့ အဖြစ်နဲ့ သွားသွားတိုးတတ်တဲ့ အလှူခံခြင်းမျိုးပါ .. လှူနိုင်တဲ့ခါ လှူပြီး မလှူချင်တဲ့ခါလည်း မရှိဘူးပဲ ပြောပြောခဲ့တယ်

နောက် ဘူဖေးဆိုင်မှာ ကြုံခဲ့ဖူးတဲ့ အလှူခံခြင်းမျို.. ဒါကလည်း တစ်မျိုးလေး ထူးဆန်းတယ် .. အ၀စား မကုန်ရင် အလေးချိန်ချိန်ပြီး ငွေပြန်အန်းရမယ် ဆိုတဲ့ စာသားချိတ်ထားတဲ့ ဆိုင်တစ်ဆိုင်မှာ ..  .. အသားတွေ ပြုတ်စားရတဲ့ ဘူဖေးမျိုး .. ကိုယ်က စားနိုင်သလောက်ပဲ ယူပြီး ပြုတ်၊ ကင်စားနေတုန်း .. စားပွဲထိုးလေးတစ်ယောက်က သူတို့ကြိုက်ရာအသားတွေ အများကြီးယူလာပြီး ပြုတ်အိုးထဲ ထည့်ပါရစေတဲ့ .. ပြီးရင် သူတို့ မန်နေဂျာမမြင်အောင် ၀ှက်ယူပါ့မယ်တဲ့ .. အလှူခံတာပါတဲ့ .. အဲဒီတုန်းက မန်နေဂျာမြင်မှာစိုးလို့ ခိုးကြောင်ခိုးဝှက်နဲ့ လှူခဲ့ရဖူးတယ် ...

ဓမ္မယံကြီးဘုရားဝန်းမှာ တွေ့ခဲ့တဲ့ ကလေးတွေကတော့ ဘုရားသမိုင်းအကြောင်း ရှင်းပြပါရစေဆိုပြီး အလှူခံတယ် .. ဒါပေမယ့် ကိုယ်မသိချင်ဘူးဆိုလည်း အတင်းကပ်လိုက်မနေဘူး .. သိချင်ရင်ပြောပါတဲ့ .. ချစ်စရာကောင်းတယ် .... ကျောက်တုံးကြီးတစ်တုံးအကြောင်းကိုတော့ ပြောပြတယ် .. "ဒီကျောက်တုံးကြီးကို  လက်နှစ်ဖက်ကို ကြက်ခြေခတ် လျှိုသွင်းပြီး ဖြတ်စေတဲ့စက်လို့ လူတွေက လျှောက်ပြောကြတာ... အမှန်တော့ ဘုရားတည်လို့ အုတ်တွေစီတဲ့အခါ ထောင့်ချိုးတွေမှာ အုတ်တွေခိုင်အောင် ညှပ်တဲ့ဟာပါ ..
 လူတွေ ထင်သလိုမဟုတ်ပါဘူး" တဲ့။ 












ကျွန်မ အဲဒီကလေးကို သဘောကျသွားတယ် .. ကလေးဖြစ်ပေမယ့် ယုတ္တိမတန်တာတွေ ဇာတ်ဆန်ဆန် လျှောက်မပြောဘဲ ယုတ္တိဗေဒကျကျလေး ပြောတတ်တာလေးကိုပါ .. နောက် သရက်သီးစိတ်တွေဝယ်ပြီး အဲဒီကလေးတွေနဲ့ အတူထိုင်စားကြတယ် .. 

.ကောင်လေးအကြီးလေးက လေးတန်းနဲ့ ကျောင်းထွက်ထားတယ်တဲ့..အငယ်လေးတွေက ကျောင်းအားတုန်း အလုပ်လုပ်တာတဲ့ .. ဘုရားအကြောင်းတွေသိအောင် စာဖတ်တာလား မေးတော့ .. ကိုယ့်ထက် သိတဲ့ လူကြီးတွေဆီက သင်တာပါတဲ့ .. အငယ်လေးက " သားတို့ အစ်ကိုက ဒီဘုရားမှာပဲ သဲပန်းချီရေးတယ်လေ .. သားတို့က သူ့ဆိုက်ကယ်နဲ့ လိုက်လိုက်လာတာ .. အိမ်မှာဆို ပူတယ်ဗျ ဘုရားမှာက ပိုအေးတယ် .. သားတို့ရေချိူးရင် လောကနန္ဒာဘုရားနားက ဧရာဝတီမြစ်ထဲ ဒိုင်ဗင်သွားသွားပစ်တာပဲ .. သိပ်ပျော်ဖို့ကောင်းတာ"။ ခဏနေတော့ ဧည့်သည်တစ်စုဝင်လာတယ် .. " သွားလေ .. မင်းရှင်းပြရမယ့် အလှည့်မဟုတ်လား" ကျွန်မ အငယ်လေးကို ပြောလိုက်တယ်။ "သူတို့မှာ ဂိုတ် ပါတယ် .. သားသွားဖို့မလိုဘူး" တဲ့။ ကျွန်မ အဲဒီကလေးတွေကို မုန့်ဖိုးပေးတော့ "ကျေးဇူးတင်ပါတယ်" တဲ့။ ဒီလို ယဉ်ကျေးပြီး ရိုးသားချစ်စရာကောင်းတဲ့ ကလေးတွေကို ကျွန်မ စာသင်ကျောင်းကြီးထဲ စာအံလိုက်၊ ဆော့ကစားလိုက်နဲ့ပဲ မြင်ချင်တာပါ....။

(၂၈ ဧပြီ ၂၀၁၂ ... ပုဂံရောက်တုန်းက မှတ်မှတ်ရရ နှလုံးသားကို ထိခတ်စေခဲ့တဲ့ အရာတွေကို ခံစားတင်ပြခြင်းပါ။)












Sunday, March 25, 2012

အလျော်အစား


စိတ်ခံစားချက်ကို စိတ်ခံစားချက်နဲ့မှ
အလျော်ပေးရမယ်ဆို

ငါ့ခံစားချက်တွေ နင်ချေမွပါ။

အလွမ်းကို အလွမ်းနဲ့မှ
အလျော်ပေးရမယ်ဆို

ငါလွမ်းရဖို့လည်း အသင့်ဖြစ်ပါတယ်။

ဝမ်းနည်းမှုကို ၀မ်းနည်းမှုနဲ့မှ
 အလျော်ပေးရမယ်ဆို

ငါ့ဝမ်းနည်းမှုတွေ နင့်အတွက်စစ်မှန်စေရမယ်။

နာကျင်မှုကို နာကျင်မှုနဲ့မှ
အလျော်ပေးရမယ်ဆို

ငါ့နာကျင်မှုတွေ နင့်ရှေ့သက်ဝင်စေမယ်။

ငါ ....အကြောင်းပြချက်မပေးဘူး

ဖြေရှင်းချက်လည်းမရှိဘူး

ကျေပျက်ပါစေလို့လည်း မတွေးဘူး

ဘာနဲ့မှလည်း မချည်နှောင်ဘူး 

ငါပေးတဲ့အလျော်အစားတွေနဲ့

နင့်မာနတွေ အရောင်တင်နိုင်ခဲ့ရုံဆို တော်ပြီ.....။


 တနင်္ဂနွေနေ့တစ်နေ့





Saturday, March 24, 2012

ကျွန်မနှင့် စိတ်ဒဏ်ရာ


မှတ်မှတ်ရရ.....ကျွန်မ စိတ်ဒဏ်ရာဆိုတာနဲ့ ပထမဆုံးထိတွေ့ဖူးတဲ့ အဖြစ်ပျက်လေးတစ်ခုရှိခဲ့တယ်။ အဲဒီတုန်းက ကျွန်မအသက် ၁၁ နှစ်ဖြစ်မယ်ထင်တယ်။ ၅ တန်းနှစ်က။ ကျွန်မတို့ကျောင်းမှာ စာသင်နှစ်တစ်နှစ် ကုန်ဆုံးတိုင်း နှုတ်ဆက်ပွဲဆိုတဲ့ ပွဲလေးလုပ်လေ့ရှိတယ်။ အဲဒီနေ့ဆို ကျောင်းသူကျောင်းသားတွေက ၀တ်ကောင်းစားလှလေးတွေ ၀တ်လာပြီး၊ သီချင်းတွေ ဆိုကြတယ်။ ဂိမ်းတွေကစားကြတယ်။ လက်ဆောင်ပစ္စည်းတွေ လဲကြတယ်။ အဲဒီနေ့ဆို မုန့်တွေကျွေးတဲ့ အစီအစဉ်တွေလည်း ရှိတယ်။ စာသင်နှစ်ပြီးကာနီး အချိန်ဆိုတော့ ကျွန်မတို့ အရမ်းပျော်ကြတာ။ 

ကျွန်မက အဲဒီကျောင်းကို ပြောင်းတာ ၂ နှစ်လောက်ပဲ ရှိဦးမယ်။ ကျွန်မမှာ စွဲစွဲမြဲမြဲပေါင်းတဲ့ အတန်းဖော် သူငယ်ချင်းတစ်ယောက်ရှိတယ်။ သူနဲ့ ကျွန်မနဲ့က တစ်ဝန်းတည်းနေကြတာ။ သူက ကျွန်မထက်တော့ အသက် ၂ နှစ်လောက်ကြီးမယ်ထင်တယ်။ သူနဲ့ကျွန်မ ကစားဖော် ကစားဖက်၊ ကျောင်းသွားဖော် သွားဖက်တွေ။

ကျွန်မက အဲဒီကျောင်းကို ပြောင်းလာတာ မကြာသေးတော့ အဲဒီနှစ်မှ A တန်းဝင်တယ်။ အတန်းဖော်တွေနဲ့လည်း သိပ်မရင်းနှီးသေးတဲ့အချိန်ပေါ့။ ကျွန်မတို့ အတန်းထဲမှာဆို စာတော်တဲ့ ကောင်မလေးတွေက ပေါ်ပြူလာဖြစ်ကြတယ်။ အဲဒီကောင်မလေးတွေကလည်း နည်းနည်း လူကြီးဂိုက် ဖမ်းနေကြပြီ။ ကျွန်မက စာတော်တဲ့ထဲပါပေမယ့် ကလေးစိတ် မကုန်ဘဲ မျောက်ရှူံးအောင် ဆော့်တာကတစ်ကြောင်း၊ မဲမဲတုံးတုံးလေးဖြစ်တာက တစ်ကြောင်း ထင်ထင်ပေါ်ပေါ်တော့ မရှိလှဘူး။ နောက်ပြီး A တန်းကို ၀င်လာတဲ့ လူသစ်ဖြစ်နေတော့ မြို့ကျောင်းကလေးတွေသဘာဝ ကြီးကြီးကျယ်ကျယ်နိုင်ကြတယ်။

အဲဒီနှစ်က စာသင်နှစ်ကုန်ကာနီးလေ နှုတ်ဆက်ပွဲနေ့ကို ကြိုတွေးပြီး ပျော်လေပေါ့။ ကျွန်မနဲ့ ကျွန်မသူငယ်ချင်းလည်း သီချင်းဝင်ဆိုချင်ကြတယ်။ နှုတ်ဆက်ပွဲမှာ သီချင်းဆိုမယ့်သူတွေ စာရင်းပေးဖို့ အတန်းခေါင်းဆောင်က လိုက်ကောက်တယ်။ သူက အမြဲအတန်းခေါင်းဆောင်အဖြစ် ခန့်ထားခံရတယ်။ အတန်းခေါင်းဆောင်ပီပီ အသံကလည်း ဟောင်ဖွာဟောင်ဖွာ......ဆရာကြီးကလည်း အားကြီးလုပ်ချင်တယ်။ ပြီးတော့ သူ့မှာ ပေါ်ပြူလာဖြစ်တဲ့သူတွေကို မျက်နှာလိုက်တတ်တဲ့ အကျင့်လည်း ရှိတယ်။ အဲဒီလို မထင်မပေါ်လူတွေဆို နှိမ်တတ်တဲ့ အကျင့်လေးကလည်း ရှိတယ်။  ကလေးတုန်းကတော့ ကလေးနှိမ်နှိမ်တာပေါ့နော်။ ကျွန်မတော့ သူ့ကို ဘူဇွာကြီးလို့ ခေါ်တာပဲ။ အဲဒီနေ့က စာရင်းလိုက်ကောက်တော့ ကျွန်မတို့ နှစ်ယောက်လည်း စာရင်းပေးခဲ့ကြတယ်။ 

စာမေးပွဲအတွက်လည်း စာကျက်နေရတဲ့ကြားက ကျွန်မတို့နှစ်ယောက်မှာ သီချင်းတစ်ပုဒ်တူတူဆိုမယ်ဆို သဘောတူလိုက်တယ်။ ဒါပေမယ့် ကျွန်မတို့ ဘာသီချင်းဆိုရမှန်းမသိဘူး။ အဲဒီအချိန်တုန်းက ကျွန်မတို့ ရင်းနှီးတာဆိုလို့ စိုင်းထီးဆိုင် သီချင်းတွေပဲရှိတယ်။ ဘာလို့လဲဆိုတော့ ကျွန်မတို့ အိမ်ဘေးမှာနေတဲ့ ရှမ်းတိုင်းရင်းသား အဒေါ်ကြီး တစ်ယောက်ရှိတယ်။ သူက ကလေးတွေကို ချစ်တယ်။ ကျွန်မတို့က ညဘက်ဆို သူ့အိမ်မှာ အမြဲသွားသွားကစားလေ့ရှိတယ်။ ကျွန်မတို့ သွားကစားတိုင်း အဲဒီ အဒေါ်ကြီးက ဂစ်တာတီးပြီး စိုင်းထီးဆိုင်သီချင်းတွေ ဆိုဆိုပြတယ်။ ကျွန်မတို့လည်း သူဆိုပြနေကျ ဘီးနံပါတ် OK သုည 122 အလ် တို့၊ မောတော့မောတာပေါ့ ဒါပေမယ့် မမောဘူးတဲ့၊ ချယ်ရီပင်အောက်နောက်တစ်ခေါက်တို့ ဆိုတဲ့ သီချင်းတွေနဲ့ပဲ ရင်းနှီးနေခဲ့တယ်။

အဲဒါနဲ့ ကျွန်မတို့နှစ်ယောက်လည်း စိုင်းထီးဆိုင်သီချင်းတစ်ပုဒ်ပဲ ရွေးဖို့ဆုံးဖြတ်လိုက်တယ်။ ဘယ်လိုဖြစ်လို့လဲတော့ မသိဘူး အဲဒီတုန်းက ကျွန်မတို့ စိုင်းထီးဆိုင်ရဲ့ နေရစ်တော့ကွယ် သွားတော့မယ် ဆိုတဲ့သီချင်းကို ရွေးလိုက်ကြတယ်။ အဲဒီလိုနဲ့ ကျွန်မနဲ့ကျွန်မသူငယ်ချင်း သီချင်းတိုက်ကြတယ်။ နှစ်ယောက်အတူဆိုမှာဆိုတော့ ပြိုင်တူဆိုပြီး တိုက်ရတာပေါ့။ သီချင်းကလည်း အလွန်ကို အေးပါတယ်။ ခုနေပြန်နားထောင်ရင်တောင် အလွန်အိပ်ချင်စရာကောင်းတဲ့ သီချင်းမျိုး။ အဲဒီတုန်းက ငါးတန်းကလေးအရွယ်နဲ့ ဘာကြောင့်ဆိုဖို့ ရွေးခဲ့လည်းတော့ မသိဘူး။ ဖြစ်ချင်တော့ ကျွန်မသူငယ်ချင်းကလည်း Chorus အပုဒ်ရောက်လာရင် ကီးက ကြောင်ကြောင်နေပြန်တယ်။ သူက သီချင်း မဆိုတတ်ဘူး။ ကျွန်မကတော့ သီချင်းတွေနဲ့ လက်ပွန်းတတီးတော့ရှိတယ်။ ကီးဝင်အောင်တော့ ဆိုတတ်တယ်။ ဒီလိုနဲ့ ကျွန်မတို့ ညညဘက်ဆို အဲဒီ ရှမ်းအဒေါ်ကြီးအိမ်မှာ သီချင်းသွားသွားတိုက်ရတယ်။ ကျွန်မတို့ ဆိုမယ့်အိုက်တင်ကိုပါ ကျင့်ရတယ်။ ဒီလိုသီချင်းမျိုးနဲ့ဆိုတော့ ကျွန်မတို့ စစ်ချီတေးဆိုသလိုပါပဲ ....တောင့်တောင့်ကြီးတွေရပ်ပြီး အလွန်မှ အေးတဲ့ သီချင်းကို ခဏခဏဆိုကျင့်ခဲ့တယ်။ ကျွန်မသူငယ်ချင်းအသံကလည်း နည်းနည်း ဘဲသံလို ရှဲရှဲရှဲရှဲ ဖြစ်နေတယ်။ ဘယ်လောက်တိုက်တိုက်လည်း အဲဒီ "ခွဲရကာနီးမှ နှုတ်မဆက်နိုင်တယ်" ဆိုတဲ့နေရာရောက်တာနဲ့ ကီးကကြောင်တော့တာပဲ။ နောက်တော့ ဘယ်လိုမှ တိုက်မရတော့ ဒီလိုပဲ အပြီးသတ်လိုက်တယ်။ 

ဒီလိုနဲ့ နှုတ်ဆက်ပွဲနေ့ရောက်လာပါတယ်။ ထုံးစံအတိုင်း အားလုံးက လှလှပပလေးတွေ ၀တ်စားလာကြတယ်။ သီချင်းဆိုမှာပါတဲ့သူတွေကဆို ပိုပြီးတော့ ပြင်လာကြတာပေါ့။ ထုံးစံအတိုင်း အတန်းခေါင်းဆောင်ကတော့ ဟောင်ဖွာဟောင်ဖွာနဲ့ စီမံနေရတာကို ကြီးကြီးကျယ်ကျယ်လုပ်နေတယ်။ သူက အဲဒီလိုနေ့ပွဲတွေတိုင်းလည်း အမြဲ အခန်းအနားမှူးလုပ်နေကျ။ အခမ်အနားအစီအစဉ်လည်း သူပဲ ပြင်ဆင်တယ်။ ဟိုလူ့ဟောက် ဒီလူ့ဟောက်လည်း လုပ်နေသေးပြန်တယ်။ ကျွန်မနဲ့ ကျွန်မသူငယ်ချင်းလည်း လချီပြီး ကြိုတိုက်ထားတဲ့ သီချင်းကို ဆိုရတော့မယ်ဆို ကြိုတင်ရင်ခုန်နေကြတယ်။ ကျွန်မတို့ အဲဒီနေ့က အလှအပပြင်သလား မပြင်သလားတော့ ကျွန်မသိပ်မမှတ်မိတော့ဘူး။ ဒါပေမယ့် ရင်ခုန်နေတာတော့ မှတ်မိတယ်။ အဲဒီလိုနဲ့ အခန်းအနား စပါတယ်။ အတန်းခေါင်းဆောင် ဘူဇွာကြီးက အခန်းနားအစီအစဉ်တွေ တခုခုပြီးတစ်ခု ဖတ်ပြသွားတယ်။ အဲဒီမှာ ကျွန်မတို့သီချင်းဆိုမယ့် အစီအစဉ်ကို နောက်ဆုံးမှာထည့်ထားတယ်။ ကျွန်မတို့ရှေ့မှာတော့ ပေါ်ပြူလာ ကောင်မလေးတွေရဲ့ အစီအစဉ်တွေ အများကြီးထည့်ထားတယ်။ စိတ်ထဲတော့ မကျေမနပ်ဖြစ်သွားတယ်။ ငါတို့ကျ နောက်ဆုံးထည့်ထားတယ်ပေါ့။ 

အဲဒီမှာ ဘူဇွာကြီးက သီချင်းဆိုမယ့်လူက ဘယ်သူ့အလှည့်ဖြစ်ပါတယ်ဆို ကြေငြာနေလိုက်တာ တကယ့် ခန်းနားမှူးကြီးလို ဟန်ပါပါနဲ့ပေါ့။  ကျွန်မတို့အတန်းထဲက ပေါ်ပြူလာဖြစ်တဲ့ကောင်မလေးတွေက ဘာသီချင်းတွေဆိုကြလဲဆိုတော့ အဆိုတော် မေဆွိတို့၊ နောင်တို့ရဲ့ "ငရုတ်သီး" သီချင်းတို့ဘာတို့ စတဲ့ ခပ်မြူမြူး ခေတ်ပေါ်သီချင်းလေးတွေနဲ့ ကကြဆိုကြတယ်။ ကျွန်မတို့လည်း သဘောကျတာပေါ့။ ဒါပေမယ့် စိတ်ထဲတော့တွေးမိတယ် ကျွန်မတို့ သီချင်းက အေးများနေသလားပေါ့.. စစ်ချီတေးလို တောင့်တောင့်ကြီးဆိုပြီး ကီးကြောင်ကြီးနဲ့ ထထအော်ရင် ကဲ့ရဲ့များခံရမလား နည်းနည်းတော့တွေးမိတယ်။ တစ်ယောက်ပြီးတစ်ယောက် ဆိုပြီးသွားတိုင်း ကျွန်မတို့အလှည့်ရောက်လာတော့မယ်ဆို ရင်တခုန်ခုန်နဲ့ စိတ်ရှည်ရှည်စောင့်ရင်း ညနေပိုင်းကလည်း ရောက်လာခဲ့တယ်။ အဲဒီလိုနဲ့ မထင်မှတ်ပါပဲ ကျွန်မတို့အလှည့်ရောက်မယ့် အချိန်မှာ ဘူဇွာကြီးက သီချင်းဆိုတဲ့ အစီအစဉ်ပြီးဆုံးကြောင်း ထကြေငြာလိုက်တယ်။ ကျွန်မတို့လည်း တော်တော် စိတ်တိုသွားပြီး ဘူဇွာကြီးကို သွားထပြောတဲ့အချိန်မှာ အချိန်မရှိတော့ဘူး ဂိမ်းကစားတော့မှာမို့ ပြီးပြီဆို ဖြတ်ချလိုက်တယ်။ အဲဒီနေ့က ကျွန်မတော်တော် စိတ်မကောင်းဖြစ်သွားတယ်။ ဒီလောက် ကြိုးစားပမ်းစား တိုက်ခဲ့ရတဲ့ သီချင်းကို မှန်းထားတဲ့အတိုင်း မဆိုလိုက်ရပါဘဲ အိမ်ပြန်ခဲ့ရတယ်။ 

 အဲဒီကျောင်းမှာ ကျွန်မဆယ်တန်းအောင်တဲ့အထိ နေခဲ့ပေမယ့် နောင်နှစ်တွေမှာ ကျွန်မဘယ်တော့မှ သီချင်းဝင်မဆိုတော့ပါဘူး။ အဲဒီဘူဇွာအတန်းဖော်ကတော့ ထုံးစံအတိုင်း နှစ်တိုင်း အတန်းခေါင်းဆောင်နဲ့ MC လုပ်မြဲပါပဲ။ ကျွန်မစိတ်ထဲမှာလည်း  အနှိမ်ခံရလို့လား၊ လူသစ်မို့လား၊ ပေါ်ပြူလာဖြစ်သူ မဟုတ်လို့လား၊ မဲမဲတုံးတုံးလေးမို့လား ဆိုပြီး ဘာကိုမှန်းမသိ မှတ်မှတ်ရရ နာနာကျင်ကျင်ဖြစ်ခဲ့တယ်။

ဒီလိုနဲ့ပဲ အချိန်တွေကြာလာခဲ့တယ်။ ကျွန်မလည်း တက္ကသိုလ်တတ်၊ ပြည်ပမှာ ပညာဆက်သင်ပြီး သင်တန်းကျောင်းတစ်ကျောင်းမှာ ဆရာမဖြစ်လာခဲ့တယ်။ တနေ့ကျတော့ ကျွန်မအတန်းသစ်တစ်ခုကို စ၀င်ရတဲ့နေ့ပေါ့။ ကျွန်မကို ကျောင်းသားတစ်ယောက်က တရင်းတနှီးကြီး လာနှုတ်ဆက်တယ်။ "ဟဲ့ .. နင်ဒီမှာ ဆရာမလုပ်နေတာလား" ကျွန်မကြည့်လိုက်တော့ ငယ်ငယ်တုန်းက ဘူဇွာကြီးဖြစ်နေတယ်။ " ငါဒီမှာ သင်တန်းလာတတ်တာလေ" တဲ့ သူပြောတယ်။ "နင်ငါ့ကို မမှတ်မိဘူးလား" တဲ့။ မှတ်မိတာပေါ့..။ ကျွန်မရဲ့ ကလေးဘ၀စိတ်ဒဏ်ရာကြီးပဲ...။ အဲဒီနေ့က ကျွန်မဘူဇွာကြီးတို့ အတန်းကို စာသင်ပြီး ပြန်လာခဲ့တယ်။ အပြန်လမ်းမှာ ဘာကြောင့်ရယ်မသိ ကျွန်မတစ်ယောက်တည်း ပြုံးလိုက်မိတယ်..။ နောက်ပြီး ကျွန်မကောင်းကင်ကို မော့ကြည့်မိတယ်။ တိမ်တွေနဲ့ လင်းလင်းချင်းချင်း ပြီးတော့ ကျွန်မ အသံထွက်ပြီးပဲ ရယ်လိုက်မိပါတယ်.. ပထမတစ်ကြိမ်ပြုံးလိုက်မိတဲ့ အပြုံးအတွက် ကျွန်မကိုယ်ကျွန်မ ရယ်မိတာပါ။ ကျွန်မစိတ်ထဲမှာတော့ စိုင်းထီးဆိုင်သီချင်းမဆိုရတဲ့ စိတ်ဒဏ်ရာဟာ အဲဒီကောင်းကင်ကိုမော့ကြည့်လိုက်တဲ့ အချိန်လေးအတွင်းမှာ အလွန်ကို ရီစရာကောင်းစွာနဲ့ ကျေပျက်သွားခဲ့ပါပြီ။

အခုချိန်မှာတော့ ကျွန်မ နာကျင်မှုကို ပုံသဏ္ဍန်မျိုးစုံနဲ့ သင်ယူနေခဲ့ရပါပြီ။ မျှော်လင့်တာတွေဖြစ်မလာတဲ့အခါ၊ လိုချင်ရက် မရယူနိုင်တဲ့အခါ၊ မလိုချင်ပါဘဲ ရယူလိုက်ရတဲ့အခါ၊ အကြောင်းပြချက်မရှိ ရှုံးနိမ့်လိုက်ရတဲ့အခါ၊ အမျှော်လင့်တဲ့အရာတွေကို နှလုံးသွင်းလိုက်ရတဲ့အခါ၊ ချစ်ခင်သူတွေ ခွဲခွါသွားတဲ့အခါ၊ ပိုင်ဆိုင်နေကျအရာတွေ ပျောက်ဆုံးသွားတဲ့အခါ စသဖြင့် နည်းလမ်းအသွယ်သွယ်နဲ့ နာကျင်မှုတွေကို သင်ယူနေခဲ့ရတယ်။  နာကျင်မှုတစ်ခု ဒဏ်ရာအဖြစ် မြုံကျန်ခဲ့မယ့်အချိန်တိုင်း အဲဒီလို တိမ်တွေနဲ့ လင်းလင်းချင်းချင်းကောင်းကင်ကြီးကို မော့ကြည့်ရင်း အဲဒီလို အသံထွက်ရယ်မောရင်း ကလေးဘ၀က စိတ်ဒဏ်ရာလေးလိုပဲ ရီစရာကောင်းစွာ ကျေပျက်သွားအောင် ကျွန်မကြိုးစားနေထိုင်နေပါတော့တယ်......။

၂၄ မတ်လ ၂၀၁၂
စနေနေ့

Wednesday, March 21, 2012

အဲဒီမြို့

အဲဒီမြို့
မြေလွတ်မြေရိုင်းတွေ ပေါတဲ့မြို့
ကွန်ကရစ် လမ်းမကျယ်တွေ ထိုးထောင်ထွက်နေတဲ့မြို့
နီယွန်မီးတွေ အပြိုင်းအရိုင်း ပြိုကျနေတဲ့မြို့

အဲဒီမြို့……
တောသူမလေး တစ်ယောက်
မတောက်တခေါက်အလှပြင်ထားသလို
မိတ်ကပ်တွေ ပေကျံနေတဲ့မြို့
ရုရှဖက်ဒရေးရှင်းလို Shock Therapy နည်းနဲ့
Transition နောက် ဒရောသောပါး လိုက်လိုက်ရတဲ့မြို့
အစိမ်းရောင် လွန်ကဲတဲ့မြို့
အူတိအူကြောင် မြို့တော်ဖြစ်လိုက်ရတဲ့မြို့…….

အဲဒီမြို့ဟာလေ
လွင်ထီးခေါင် အလှတရားတစ်ခု ရှိနေသေးလို့သာ
မော်တော်ဆိုက်ကယ် ယဉ်ကျေးမှုတစ်ခု ရှိနေသေးလို့သာ
မြို့ကြီးသားလေထုတွေရဲ့ ကျေးတော်ကျွန်တော်ဘ၀ မကျရောက်သေးလို့သာ
ဖားလောင်းဆန်ဆန်လေး လှနေသေးပြန်တာ………..။

(၁၁ မတ်လ ၂၀၁၂ အမှတ်တရ)

Tuesday, March 20, 2012

ကျွန်မနှင့် သစ်ပင်များ

ငယ်ငယ်တုန်းက ကစားနေကျ ကစားနည်းတစ်ခုရှိတယ်။ "တန်ခူးလမှာ ဘာရွက်လဲ" လို့ ပြေးမဲ့လူကမေးရင်လိုက်မယ့်သူတွေက "ပိတောက်ရွက်" ၊ "ကဆုန်လမှာ ဘာရွက်လဲ" စသည်ဖြင့် ၁၂ လရာသီအလိုက် မေးတဲ့လူကမေးရပြီး လိုက်မယ့်သူက အရွက်နာမည်တွေကိုဖြေ၊ အဲဒီဖြေလိုက်တဲ့အရွက်ကို ဖမ်းတဲ့လူ လိုက်မမှီခင် အမှီရအောင် ရှာခူးရတယ်။ အဲဒီလိုရှာခူးနိုင်ဖို့ကို သစ်ပင်နဲ့ အရွက်တွေကို အရင် သင်ယူထားရတာပေါ့။

ကျွန်မငယ်ငယ်ကဆို သစ်ပင်တွေကို သိပ်စိတ်ဝင်စားတယ်။ လမ်းတစ်လျှောက်သွားပြီဆို ဟိုဟာ ဘာပင်လဲ.. ဒီဟာဘာပင်လဲ မေးလွန်းလို့ ကျွန်မနဲ့ အတူသွားတဲ့လူကြီးတွေဆို ကျွန်မကိုပြောတယ် နင်တော့ ကြီးလာရင် သစ်ပင်တွေအကြောင်း သင်ရတဲ့ အလုပ်မျိုး လုပ်မယ်ထင်တယ်တဲ့။

သစ်ပင်တွေအကြောင်း ကျွန်မ စပြီးမှတ်မှတ်ရရရှိခဲ့တဲ့အချိန်ဆို ကျွန်မ လေးနှစ် သမီးလောက်က ဖြစ်မယ်ထင်တယ်။ ကျွန်မတို့ နေရတဲ့ ၀င်းကြီးက အကျယ်ကြီး... အရင်က သင်္ချိုင်းကြီး ဖြစ်ခဲ့ဖူးတယ်လို့တောင်ပြောကြတာ။ အဲဒီဝင်းအကျယ်ကြီးထဲမှာ ကျွန်မတို့နေတဲ့ ၂ လုံးတွဲ နှစ်ထပ်အိပ်ကလေး ရှိတယ်။ အဲဒီမှာ ကျွန်မ အဖေဘက်က အမျိုးတွေ နဲ့ အဘိုးအဘွားတွေ အားလုံးစုနေကြတယ်။ အဲဒီဝင်းကြီးရဲ့ အနောက်ဘက်ဝေးဝေးမှာ ကျူပင်တွေ တရုန်းရုန်းထနေတဲ့ တောကြီးရှိတယ်။ အဲဒီတောကြီးကိုမရောက်ခင် ရေကန်ကြီးတွေ၊ ကန်သင်းတွေလည်း ဖြတ်ရတယ်။ အဲဒီရေကန်တွေထဲမှာ သဲကန်ကြီး တစ်ကန်လည်းပါတယ်။ အဲဒီကန်ထဲမှာ ပုစွန်တွေလည်းပေါတယ်။ ငါးတွေလည်း မျှားလို့ရတယ်။ ကျူတော ကြီးထဲမှာတော့ မြွေတွေပေါတယ် ပြောကြပေမယ့် ကျွန်မတို့ မောင်နှမတွေ တစ်ယောက်မှတော့ မြွေနဲ့ မတိုးခဲ့ကြဘူး။ သဲကန်ကြီးထဲဆို ကျွန်မအစ်ကိုတွေက ဒိုင်ဗင်ပစ်နေကျ။ ကျွန်မက အဲဒီတုန်းက ငယ်သေးတော့ ကျွန်မအစ်ကိုတွေ ဘောင်းဘီစဆွဲပြီး တကောက်ကောက် လျှောက်လိုက်နေတဲ့ အရွယ်ပေါ့။ သူတို့ ကစားဝိုင်းတွေထဲ မပါရလို့ ငိုငိုယိုယိုနဲ့ တိုင်တန်းတတ်လွန်းလို့ ကျွန်မကို ငယ်ငယ်က လူဆိုးမလို့ မကြာခဏပြောကြတယ်။ မှတ်မှတ်ရရပါ .. အဲဒီဝင်းကြီးရဲ့ မြောက်ဘက်အရပ်မှာ ညောင်ပင်ကြီးတစ်ပင်ရှိတယ်။ အဲဒီညောင်ပင်ကြီးမှာ ကျစ်ကြိုးကြီးနှစ်ချောင်းကို သစ်သားပြား တစ်ပြားမှာ ချည်ထားပြီး ကျွန်မတို့ မောင်နှမတွေ ဒန်းလုပ်စီးတတ်ကြတယ်။ ကျွန်မအစ်ကိုတွေက ကစားပြီဆို မျောက်ရှုံးအောင် ဆာ့ကြတယ်။ မောင်နှမတွေလည်းများ၊ လွတ်လည်း လွတ်လပ်တော့ ဘေးမဲ့တောထဲက တိရစ္ဆာန်လေးတွေလို မီးကုန်ယမ်းကုန် ကစားတတ်ကြတယ်။ အဲဒီညောင်ပင်ကြီးမှာ ဒန်စီးပြီဆို လေထဲကို လွင့်နေအောင်ကို လွှဲကြတာ။ ကျွန်မကလည်း သူတို့စီးတော့ ငိုငိုယိုယို စီးမယ်လုပ်တော့ သူတို့ အမြင်ကပ်ကပ်နဲ့ အမြင့်ကြီးရောက်အောင် လွှဲ၊ ကျွန်မကလည်း အဲဒီလိုများစီးရပြီဆို ပျော်တာမှ။ ဘယ်တော့မှမမေ့တဲ့နေ့တွေပေါ့။ အဲဒါနဲ့ကျွန်မတို့အတွက် အဲဒီ ညောင်ပင်ကြီးက ကစားရပ်ဖြစ်နေတတ်တယ်။ ကျွန်မမှတ်မိသလောက် အဲဒီညောင်ပင်ကြီးမှာ နတ်ပူဇော်တာတွေ မကြာခဏ လာလာ လုပ်လေ့ရှိကြတယ်။ အမေတို့က ကျွန်မတို့ကို အဲဒီမှာ မဆော့ဖို့ အမြဲမှာတတ်တယ်။ ဒါပေမယ့် ကျွန်မတို့ မောင်နှမတွေကတော့ အဲဒီ နှစ်ချို့ ညောင်ပင်ကြီးကို တအားသံယောဇဉ်ကြီးကြတယ်။

တစ်နေ့ကျတော့ ကျွန်မ ဗိုက်ထဲမှာ အလုံးကြီးတစ်လုံး ပေါ်လာပြီး ပြင်းပြင်းထန်ထန် အောင့်အောင့်လာတယ်။ အဲဒီအချိန် ကျွန်မမောင်လေးက မွေးကာစ လသားလေးပဲ ရှိသေးတယ်။ ကျွန်မဗိုက်အောင်ပြီဆို မချိမဆန့် ခံစားရတယ်။ ဗိုက်ထဲက အလုံးကြီးကလည်း ဟိုပြေးလိုက် ဒီပြေးလိုက်နဲ့ တအားခံစားရတာလို့ အမေက ပြောဖူးတယ်။ အဲဒီလိုနဲ့ ကျွန်မဆေးရုံတွေ မကြာခဏ တက်ရတယ်။ ကျွန်မမောင်လေးက ကျွန်မဆေးရုံပဲတက်နေရတော့ အမေနို့မစို့ရဘူးလို့ ပြောတယ်။ ကျွန်မဆေးရုံတစ်ခုကဆင်းလာပြီး မကြာဘူး နောက်တစ်ခု တက်ရလိုက်နဲ့.. ကလေးဆေးရုံပေါင်းများစွာကို လှည့်တက်ခဲ့ရတယ်တဲ့။ ကျွန်မဗိုက်ထဲကအလုံးကြီးကလည်းဓာတ်မှန်ရိုက်လည်းမမြင်ရဘူးတဲ့။ ပေါ်လာပြီး ပျောက်တဲ့အခါကျ ပြန်ပျောက်သွားပြန်သတဲ့။ အဲဒီရက်တွေမှာ ကျွန်မရောဂါဖြစ်ရတာ နတ်ပြုစားတာများလားဆို ကျွန်မအဒေါ်က စပြီး သံသယာဝင်လာခဲ့တယ်။ ကျွန်မ ညောင်ပင်းကြီးဆီ သွားသွားဆော့လို့ တခုခုဖြစ်တာဆို ယုံကြည်စိတ်က ပိုပြင်းထန်လာကြတယ်။ ဒီလိုပဲ ကျွန်မလည်း ဆေးရုံတတ်ရလိုက် ပျောက်လို့ ပြန်ဆင်းလာလိုက်နဲ့ သံသရာလည်နေစဉ် တစ်နေ့မှာ.. ကျွန်မအဒေါ်က အလုပ်သမားတွေငှားပြီး အဲဒီညောင်ပင်ကြီးကို ခုတ်လှဲလိုက်ပါတယ်။ ငယ်ငယ်လေးတုန်းက ငယ်ငယ်လေးအလျောက် ၀မ်းပန်းတနည်းဖြစ်ခဲ့ရတယ်။ အဲဒီညောင်ပင်ကြီး မရှိတော့တဲ့အဖြစ်ကို ကျွန်မမှတ်မှတ်ရရ ၀မ်းနည်းဖွယ်ရာ ပြန်သတိရတတ်တယ်။ ညောင်ပင်ကြီးမရှိတော့ ကျွန်မတို့ မောင်နှမတွေလည်း ဒန်စီးရမယ့် နေရာမရှိကြတော့ဘူး။ ညောင်ပင်အောက် မြေတလင်းမှာလည်း သွားမဆော့ဖြစ်ကြတော့ဘူး။ ကျွန်မဗိုက်ထဲက အလုံးကြီးလည်း နောက်ဆုံးအခေါက် ဆေးရုံအတက်မှာ ခွဲစရာမလိုဘဲ ပျောက်သွားခဲ့တယ်။ ကျွန်မအဒေါ်နဲ့ အဘိုးအဘွားတွေကတော့ အဲဒါညောင်ပင်ကြီး ခုတ်လှဲလိုက်လို့ ပျောက်သွားတာလို့ ယုံကြည်နေခဲ့ကြတယ်။ ကျွန်မကတော့ သိပ်နားမလည်ဘူး ညောင်ပင်ကြီး မရှိတော့တာပဲ ၀မ်းပန်းတနည်း ဖြစ်နေခဲ့တယ်။

အဲဒီနောက် ကျွန်မတို့ အိမ်ပြောင်းခဲ့ရတယ်။ ထုံးစံအတိုင်း ကျွန်မတို့ မိသားစုကတော့ အိမ်တွေသိပ်ပြောင်းတဲ့ မိသားစုတစ်စုပါ။ အဖေတို့က နယ်လှည့်ဝန်ထမ်းလည်း မဟုတ်ပါဘဲ အိမ်တွေတော့ သိပ်ပြောင်းရပါတယ်။ ကျွန်မနောက်ပြောင်းရတဲ့ အိမ်မှာလည်း မြေတလင်းကျယ်တွေရှိတယ်။ ဒါပေမယ့် ကျွန်မတို့ နေရတဲ့ အိမ်က ပြိုလဲကာနီးလေးမို့ ၀ါးပိုးလုံးကြီးတွေနဲ့ ထိုးကန်ထားရတယ်။ အိမ်ပေါ်ထပ်မှာ ၀ါးကပ်လိုကြမ်းမျိုး ခင်းထားတာမှတ်မိတယ်။ အဲဒီ ၀ါးကြမ်းခင်းထဲမှာ ညဆို ကြွက်တွေ ပွက်လောရိုက်နေတတ်ကြတယ်။ ဒါပေမယ့် ကျွန်မ အဲဒီ အိမ်လေးမှာလည်း ပျော်ပါတယ်။ ပထမဆုံးအကြိမ် ကျွန်မတို့ မိသားစုချည်းပဲသက်သက် နေခဲ့ရတဲ့ အိမ်ကလေးပါ။ အဲဒီခြံထဲက မြေတလင်းထဲမှာ စံပယ်တာတွေလည်းရှိတယ်။ စံပါယ်တွေပွင့်ချိန်ဆို တအားမွှေးတာ။ ဒါပေမယ့် အဲဒီစံပယ်ပင်တွေက ကျွန်မတို့ ပိုင်တာတော့ မဟုတ်ဘူး။ သူများ ပိုင်တဲ့အပင်တွေပါ။ ကျွန်မက စံပါယ်ပန်းလေးတွေတော့ ကလေးတစ်ယောက် သဘောကျပုံမျိုးနဲ့ သဘောကျတယ်။ ဒါပေမယ့် ကျွန်မ ပန်းနံ့တွေတော့ အဲဒီထဲက မကြိုက်လှဘူး။ အဲဒီခြံထဲမှာ နောက်ထပ် ဒညင်းပင်၊ သနပ်ခါးပင်၊ သရက်ပင်တွေနဲ့ မာကလာပင်တွေလည်း ရှိတယ်။ သနပ်ခါးပင်က သစ်ကိုင်းပျော့ပျော့လေးတွေဆို ကျွန်မ တစ်သက်မမေ့ဘူး။ ကျွန်မ အတန်းထဲမှာ စာမေးပွဲဖြေလို့ အဆင့်တစ်မရခဲ့ရင် အဲဒီသစ်ကိုင်းနဲ့ ကျွန်မအစ်မဆော်တာ ခံရပြီသာမှတ်။ ဒညင်းပင်အောက်က မြေတလင်းမှာဆို ကျွန်မနဲ့ ကျွန်မအစ်ကိုတွေ ကုလားမဆီး နင်းနေကျ။ မြေတွေက သဲဆန်တဲ့မြေမို့ ကလေးပီပီ သိပ်လူးလို့ကောင်းတဲ့ မြေတွေပါ။ ပြီးတော့ ကျွန်မတို့မွေးထားတဲ့ ခွေးအကြီးကြီး နှစ်ကောင်လည်း ရှိတယ်။ အဲဒီခွေးကြီးတွေကို ဒညင်းပင်အောက်က မြေတလင်းကြီးမှာ ခွခွစီးရပြီဆို ကျွန်မသိပ်ပျော်တာ။ အဲဒီတုန်းက ကျွန်မအသက် ၇ နှစ်နဲ့ ၈ နှစ်ကြား ကာလတွေထင်တယ်။ ကျွန်မတက်ရတဲ့ကျောင်းက ၄၅ မိနစ်လောက်လမ်းလျှောက်သွားရတယ်။ အဲဒီ ၄၅ မိနစ်မှာ မိနစ် ၃၀ လောက်က ၀ါးရုံတောရှိတဲ့ လမ်းကြီးကို ဖြတ်ရတယ်။ လေတအားတိုက်တဲ့အချိန်ဆို ၀ါးရုံပင်တွေ ယိမ်းထိုးပြီး တရွှီးရွှီးမြည်နေတာ မော့မော့ကြည့်ပြီး ကျွန်မ တအားသဘောကျခဲ့တာ။ ပြီးတော့ အိမ်နားမှာ သဲချောင်းလေးတွေလည်း ရှိတယ်။ အဲဒီသဲချောင်းလေးတွေထဲ ခြေတွဲလောင်းချထိုင် ၀ါးပင်က ၀ါးရွက်လေးတွေကို လှေလုပ်ပြီးမျှော၊ နောက် ချောင်းထဲဆင်းပြီး ငါးသလဲတိုးလေးတွေ လက်ခုပ်လေးနဲ့ ဆင်းဆင်းဖမ်းနဲ့ ကျွန်မမှာ အားလပ်ချိန်ကို မရှိသလောက်ပဲ။ ကျောင်းအားရက်တွေဆို ကျွန်မ မာလကာပင်ကြီး နှစ်ပင်ပေါ်ရောက်ရောက်နေတတ်တယ်။ ကျွန်မအစ်ကိုတွေ ဒညင်းပင်ကြီးပေါ်တက်တော့ ကျွန်မလိုက်တက်ချင်တယ်။ ဒါပေမယ့် ကျွန်မ ၇ နှစ်အရွယ်မို့ မတက်နိုင်ဘူး။ ကျောင်းအားရက်တွေဆို ကျွန်မတက်နေကျ မာလကာပင်ကြီး၂ ပင်ရှိတယ်။ လေတိုက်လို့ ယိမ်းထိုးနေတဲ့ သစ်ကိုင်းတွေကိုစီး၊ မိုးရွာကာနီး အုံ့မှိုင်းပြီးလှနေတဲ့ ကောင်းကင်ကြီးကိုကြည့် ပြီးတော့ မာလကာသီးတစ်လုံးကို လက်ကကိုင်စား တကယ့်ကို စိုင်းထီးဆိုင် သီချင်းထဲက ပျောက်ဆုံးနေသော နိဗ္ဗန်ဘုံတစ်ခုလိုပါပဲ။ နောက်မကြာဘူး ကျွန်မတို့ မိသားစု အိမ်ပြောင်းရပြန်ပါတယ်။ မှတ်မိတယ် ကျွန်မ ကိုးနှစ်အရွယ်ပေါ့။ အဲဒီ မြေတလင်းရယ်၊ မာလကာပင်ကြီးနှစ်ပင်ရယ်၊ ခွေးကြီးတွေရယ်ပါ ထားခဲ့ရလို့လား၊ ကျွန်မပဲ ပိုပြီးခံစားတတ်လာလို့ပဲလား မသိ ညောင်ပင်ကြီး ခုတ်လှဲတာထက် ပိုပြီး မှတ်မှတ်ရရနဲ့ ခံစားခဲ့ရတယ်။

ကံတော့ကောင်းတယ်။ ကျွန်မတို့ နောက်ပြောင်းရတဲ့ အိမ်က သဲချောင်းတွေ၊ ၀ါးရုံတောတွေ၊ စံပယ်ခင်းတွေ မရှိပေမယ့် ခြံကြီးဝန်းကျယ်ကြီးတစ်ခုပဲ။ အဲဒီခြံဝန်းထဲမှာ ရှေးဟောင်းဂေဟာကြီးတစ်ခုရှိတယ်။ အဲဒီဂေဟာကြီးက အစိုးရပိုင်ပါ။ ကျွန်မတို့က အဲဒီဂေဟာကြီး အနောက်က အစိုးရတန်းယားတွမှာ နေရတယ်။ ဒီတစ်ခါတော့ ကျွန်မတို့မိသားစု ကျွန်မအဒေါ်နဲ့အတူ ပြန်ပေါင်းနေရတယ်။ အဲဒီခြံဝန်းကြီးထဲမှာ ရေတမာပင်တွေရှိတယ်။ ခေါင်းလောင်းပန်းပင်တွေ၊ ဂျပန်နှင်းဆီးတွေ၊ ယူကလစ်ပင်တွေ၊ ပုံဏရိပ်ပင်တွေ၊ တိုက်ကပ်ပန်းပင်နဲ့ စက္ကူပန်းပင်တွေ၊ ဂေါ်သဇင်ခြံစည်းရိုးပင်တွေ နောက် ကျွန်မအချစ်ဆုံး ကန့်ကော်ပင်တွေရှိတယ်။ အဲဒီနေရာမှာ ကျွန်မအချစ်ဆုံး ဆောင်းရာသီတွေ ရှိတယ်။ ဆောင်းရောက်ပြီဆို ကန့်ကော်ပင်တွေထိပ်ဖျားပဲ ကျွန်မအမြဲတမ်း ရောက်ရောက်နေတတ်တယ်။ ကန့်ကော်ရနံ့တွေ တသင်းသင်းနဲ့ ဆောင်းတွင်း ကာလတွေ ကျွန်မမမေ့ပါဘူး။ ကျွန်မတို့ကျောင်းက မနက် ၉ နာရီတက်ရတယ်။ ကျောင်းက အိမ်နဲ့နီးတယ်။ မနက် ၇ နာရီ ၈ နာရီထိ ကျွန်မ ကန့်ကော်ပင် အဖျားမှာရှိနေတတ်တုန်း။ ကျောင်းသွားတဲ့ သူငယ်ချင်းတွေနဲ့ လှမ်းနှုတ်ဆက်လို့ကောင်းတုန်း။ အဲဒီချိန် ကျွန်မ ကဗျာတွေစာတွေ ခံစားတတ်စဖြစ်နေပြီ။ သီချင်းတွေလည်း ခံစားတက်နေပြီ။ ၁၁ နှစ် ၁၂ အရွယ်.. မှတ်မိတယ်.. ကန့်ကော်ပင်ဖျားမှာ ဗဒင်သီချင်းလေး တညီးညီးနဲ့ မနက်ခင်းတွေ။ မကြာပါဘူး အဲဒီကန့်ကော်ရနံ့သင်းတဲ့ နံနက်ခင်းတွေလည်း ကျွန်မချန်ထားရစ်ခဲ့ရတယ်။

အဲဒီနောက်ပိုင်း ကာလတချို့မှာတော့ မြို့သစ်ရပ်ကွက်တစ်ခုကို ပြောင်းရွှေ့ခဲ့ပြန်တယ်။ မြို့သစ်အိမ်က သစ်ပင်တွေ ဖြစ်ထွန်းလောက်အောင် မြေခံမကောင်းပါဘူး။ ခြံကျယ်ကြီးလည်း မဟုတ်ဘူး။ ကျွန်မတို့ပြောင်းကာစက လည်ပတ်ကြား ကွဲအက်အက်မြေပေါ်မှာ ထင်းရှူးပင်လေးတွေ အိမ်ရှေ့မျက်နှာစာမှာ စစိုက်ထားခဲ့တယ်။ ကျွန်မတို့အိမ်လေးကို ဆေးအဖြူရောင်လေး သုတ်ထားတယ်။ ကျွန်မတို့မိသားစုတွေချည်းပဲ ပြန်နေရလို့ ပျော်စရာတော့ကောင်းတဲ့ ကာလတွေပါ။ ကျွန်မ ၈ တန်း ၉ တန်း အရွယ်.. ကျွန်မအစ်ကိုတွေ ဂစ်တာတီးသင်ပေးလို့ တဒေါင်ဒေါင် တဒင်ဒင်လုပ်တတ်နေပြီ။ တချို့ ၀တ္ထုစာအုပ်တွေကို ခိုးဖတ်ပြီး လှုပ်ခတ်တတ်တဲ့ အရွယ်ပါ။ ၁ နှစ် ၂ နှစ် အကြာမှာ ထင်ရှူးပင်လေးတွေ အပြိုင်းအရိုင်းကြီးလာခဲ့ပြီ။ မြို့သစ်ဆိုတော့ အပူအအေးလွန်ကဲပြီး လေတိုက်လည်းကြမ်းတမ်းတယ်။ ညဘက်တွေဆို လေနဲ့ ဝှေ့ရမ်းနေတဲ့ ထင်းရှူးပင်တန်းတွေကြားထဲကနေ လင်းထိန်နေတဲ့ အိမ်ဖြူဖြူလေးကို လှမ်းမြင်ရတဲ့မြင်ကွင်းမျိုး ကျွန်မ တစ်သက်မမေ့ပါဘူး။ အဲဒီထင်းရှုးပင်တွေအောက် ခုံတန်းမှာ ထင်းရှူးပင်တွေကပြောတဲ့ ဂီတကို နားထောင်ရင်း (ထင်းရှူးပင်တွေက လေချွန်တယ်လေ) ကျွန်မ အစ်ကိုတွေက ဂစ်တာတီး ကျွန်မက သီချင်းတွေဆိုနဲ့ .. ထင်းရှူးနံ့သင်းတဲ့ ကာလတွေကို အခု လက်ရှိ ကျွန်မတို့နေအိမ်ကို ပြောင်းရတဲ့ခါ ထားခဲ့ရပြန်ပါတယ်။

ခုတော့ ကျွန်မတို့အိမ်မှာ ဘာသစ်ပင်မှ မရှိပါဘူး။ လှေကားထစ်တွေရှိတယ်။ သစ်ပင်ဖျားက ခံစားရတဲ့ အရသာမျိုး မဟုတ်ပေမယ့် အထပ်မြင့်တဲ့အတွက် အဝေးက တိုက်လာတဲ့ လတ်ဆက်တဲ့ လေအေးတွေကို ခံစားခွင့်တော့ရှိတယ်။ အိမ်ရှေ့အိမ်နောက် တစ်မိနစ်လောက်တောင် လျှောက်စရာမလိုဘဲ ရောက်နိုင်တယ်။ အချိန်မရှိ အချိန်ရှိမှ အိမ်ပြန်လို့ရတယ်။ တိုက်ခန်း ယဉ်ကျေးမှုတွေရှိတယ်။ မြို့ပြအငွေ့အသက်တွေရှိတယ်။ ငါးကင်ယဉ်ကျေးမှုတွေလည်း ထွန်းကားတယ်။ တခါတရံ တန်ခူးအခါတွေ လမ်းထိပ်က ပျံ့လွင့်လာတတ်တဲ့ ပိတောက်ရနံ့ကို ရှူရှိုက်ရတာကလွဲလို့ ပန်းရနံ့တွေ ဆိတ်သုန်းတယ်။ ၂၅ - ၃၀ အရွယ်၊ နှလုံးသားလည်း ထိရှမလွယ်တော့ပေမယ့် ငယ်ငယ်တုန်းက သစ်ပင်တွေကို လွမ်းစိတ်ကတော့ အမြစ်တွယ်တုန်း။ သစ်ပင်တွေရှိတဲ့ အရပ်တွေရောက်ရင် ငယ်ငယ်တုန်းကလို တလှပ်လှပ်ပျော်တုန်း။ ခရီးသွားရင်း သဲချောင်းငယ်တွေ တွေ့ရင် ငါးဆင်းဖမ်းချင်တုန်း၊ မာလကာပင်တွေတွေ့ရင် တက်ခူးစားချင်တုန်း။ ၀ါးရွက်ငယ်တွေတွေ့ရင် လှေလုပ်လွှတ်ချင်တုန်း။ ထင်းရှူးပင်တွေတွေ့ရင် သီချင်းတွေ ငြီးချင်တုန်း။ ညောင်ညိုပင်ကြီးတွေတွေ့ရင် ဒန်းဆင်ပြီး စီးချင်တုန်း... ဒါပေမယ့် .... ပျောက်ဆုံးခဲ့တဲ့ နိဗ္ဗာန်ဘုံလေးကိုတော့ ပြန်ရှာမတွေ့နိုင်တော့ပါ...........။


၂၀ မတ်လ ၂၀၁၂
၉ ၃၀ ညနေ

အလေ့ကျပေါက်ပင်

သူဘာသာသူ ရှင်သန်နေနိုင်တာနဲ့ပဲ

ပြုစုယူယဖို့ မလိုအပ်တော့ဘူးလား …

သူ့မှာလည်း နွေးထွေးတဲ့ နေရောင်ကို

ထိတွေ့ခံစားချင်စိတ်မျိုးရှိမယ်

သူ့မှာလည်း ပေါင်းမြက်၊ ပိုမွှားတွေရဲ့ရန်က

အကာအကွယ်ခံချင်လိုစိတ်မျိုးရှိမယ်…

သူ့မှာလည်း အရိပ်တကြည့်ကြည့်

သူ့အသီးအပွင့်၊ အကိုင်းအခက်တွေရဲ့

လှပဝေဆာမှုကို အကြည်နူးခံလိုစိတ်မျိုးရှိမယ်…

လေဒဏ်ရေဒဏ်ခံနိုင်လွန်းတဲ့

ဖြစ်လာရာ ကျုန်းရုန်းရှင်သန်နိုင်လွန်းတဲ့

စိတ်ဓာတ်နဲ့ အားမာန်မျိုး ရှိနေပေမယ့်

သူလည်း …

နှလုံးသားနဲ့မှ အသိအမှတ်ပြုမှု ခံယူဖို့ လိုအပ်နေသေးတဲ့

သက်ရှိသစ်ပင်တစ်ပင် ဖြစ်တယ်…။

၁၉.၁၂.၂၀၁၀

တနင်္ဂနွေ

၃း၃၀

ပထမဆုံးရေးဖြစ်သောကဗျာ

မေတ္တာကို စွန်လိုလုပ်လွှတ်လို့ရစကောင်းလား

သစ်တစ်ပင်စိုက်သလိုလေ

အရိပ်တကြည့်ကြည့်

လွတ်လပ်စွာရှင်သန်ပါစေတော့……

မလျှိုမ၀ှက် ဌာန်ကုန်ရိုးသားခဲ့လို့ ရှုံးရသတဲ့

ဒါဆို .. အဲဒီအရာ အရှုံးမဟုတ်ဘူး သေချာတယ် …..။

သဘာဝကျကျ ရိုးရိုးလေး ရှင်သန်ရအောင်ပါ

အောင်နိုင်သူမဖြစ်လည်းနေ

သိမ်းပိုက်ခြင်းကို အလှတရားတစ်ခုလို့တော့ မမြင်ဘူး……။

Saturday, March 17, 2012 at 3:44pm


ငါဘာမှမသိပါ

နာကျင်မှုကို ဘယ်လို စာလုံးနဲ့ ပေါင်းမလဲ….

လူတစ်ယောက်ဟာ ချစ်တတ်တယ် မချစ်တတ်ဘူး ဘာနဲ့တိုင်းမလဲ ….

ညစဉ် မက်တဲ့ အိပ်မက်ဆိုးနဲ့

လန့်လန့်နိုးနေဆဲ

ဒီလိုမျိုး ထွက်ခွာသွားမယ်ဆိုလည်း

ဒါနဲ့ ညီမျှတဲ့ ခံနိုင်ရည်မျိုး

တစ်ဖက်မှာ ငါ့ကို ပေးခဲ့သင့်တာပေါ့ လောကဒဏ်ရယ် ..

အဲဒီလို ယုံတောင်ပြေး ခွေးမြောက်လိုက် အတွေးတွေနဲ့

နာကျင်မှုက ဆေးမတိုးတော့တဲ့ အခြေနေ ..

ငါက လောဘကြီးသူမဟုတ်ဘူး

အများသုံး ပေတံကြီးနဲ့လည်း ချစ်ခြင်းကို ငါမတိုင်းခဲ့ဖူးဘူး

ဘုရားစူး တကယ်

အရော်အစားကြီးတယ်ဆိုလည်း

ချစ်တတ်ချင်ပါသေးတယ် …

တစ် နှစ် သုံး ရေမယ်

အချစ်ကို ငါ ပိုတွက်ခဲ့မိပြီလား

မသေချာမရေရာခြင်းတွေကိုမှ

လျှော့တွက်ခဲ့မိပြီလား …

ခါးမှန်းသိတယ်

ဘ၀ဟာ သင်ယူစရာ များမှန်းသိတယ်

တမြေ့မြေ့ တိုက်စားပြုန်းတီးသွားနိုင်တဲ့

အဆိပ်ရည်တွေမှန်းလည်းသိတယ်

သိတယ်ဆိုတဲ့ အသိလည်း ရှိတယ်

ကဲ ဘာလိုသေးလဲ

ဒါနဲ့တောင်

မိုးလင်းတိုင်း

ပူနွေးစိုစွတ်တဲ့ မျက်ဝန်းတွေနဲ့

နိုးထနေရဆဲ ..

တရေးနိုးထမေးတောင်

နောက်ထပ်တစ်ခါ

နောက်ထပ်ကြိမ်ဖန်များစွာ

ရှုံးနိမ့်ဦးရင်တောင်မှ

ဘုရားစူးတကယ်

ငါချစ်တတ်သေးချင်ပါသေးတယ် ။

လင်းပြာနွေ

၁၀နာရီ ၃၀ မိနစ်

၁၃ ဇူလိုင် ၂၀၀၉

တနင်္လာနေ့

http://linpyarnway.wordpress.com/


ပျောက်ဆုံးနေသော အဖြေများ

သင်တို့ မိမိကိုယ်ကို ကော်ဖီကြိုက်သူလား .. လက်ဖက်ရည် ကြိုက်သူလား ခွဲခြားသိပါရဲ့လား။ ဥပမာ သင်ဟာ ကြက်ဥကြိုက်သူ ဆိုပါစို့ .. သင်ဟာ ကြက်ဥရဲ့ အကာကို ကြိုက်သူလား.. အနှစ်ကို ကြိုက်သူလား မိမိ ကိုယ်ကို ခွဲခြမ်း စိတ်ဖြာဖူးပါရဲ့လား။ ထို့အတူ သင်ဟာ ကန်ဇွန်းရွက် ကြိုက်သူ ဆိုပါစို့ .. သင်ဟာ ကန်ဇွန်းရွက် အရိုးနှင့် အရွက် မည်သည်အား ပို၍ ကြိုက်နှစ်သက်ပါသနည်း။ သင်တို့ ခွဲခြမ်း စိတ်ဖြာဖူးပါရဲ့လား….

ကျွန်မသည် ကော်ဖီကြိုက်သူ ဖြစ်သည်။ ကန်ဇွန်းရွက်တွင် အရိုးအား ပိုကြိုက်သူဖြစ်ပြီး ကြက်ဥတွင်တော့ အနှစ်နှင့် အကာ မည်သည်အား ပိုကြိုက်နှစ်သက်သည်ကို ယခုထိ မခွဲခြမ်း စိတ်ဖြာနိုင်သေးပါ။ ကျွန်မ ကော်ဖီကြိုက်သူ တစ်ယောက်ဖြစ်မှန်း ရှာဖွေတွေ့ရှိခဲ့သည်မှာ အတော်အတန် ကြာခဲ့ပြီ ဖြစ်သော်လည်း ကန်ဇွန်းရွက်အရိုးအား ကျွန်မ ပို၍ ကြိုက်နှစ်သက်မှန်း ရှာဖွေတွေ့ရှိခဲ့သည်မှာ မကြားသေးမီ ကပင် ဖြစ်သည်။ သေချာသည်မှာတော့ ကျွန်မသည် ကော်ဖီကြိုက်သူ တစ်ယောက်ဖြစ်သည်။

တစ်ခါတရံ ကျွန်မတို့သည် မိမိကိုယ်ကို ခွဲခြမ်း စိတ်ဖြာဖို့ရာ မေ့လျော့နေသည် (သို့) မေ့လျော့ ထားကြသည်ဟု ကျွန်မ ထင်မြင်မိသည်။ ဘ၀တွင် ကော်ဖီ ကြိုက်သူတစ်ယောက်သည် လက်ဖက်ရည်အား မိမိ ကြိုက်နှစ်သက်သည် အထင်နှင့် တစ်ဘ၀လုံး ရွေးချယ်နေခဲ့ကြသူများလည်း ရှိကောင်း ရှိနိုင်ပါသည်။ ထိုသို့ဖြင့် ဘ၀မှတ်တိုင် အချိုးအကွေ့များ တိုက်စား သွားခဲ့ပေမည်။ ထိုသူ မိမိကိုယ်ကို ကိုယ်ဖီ ကြိုက်သူမှန်း မည်သည့် အချိန်တွင်မှ ရှာဖွေတွေ့ရှိမည်နည်း။ အချို့လူများအတွက် အချိန်တိုနှင့် ရှာဖွေတွေ့ရှိနိုင်သော်လည်း အချို့ ရှာဖွေရကောင်းမှန်းမသိ တစ်ဘ၀လုံး မေ့လျော့ သွားခဲ့သည်များလည်း ရှိနိုင်ပါသည်။ သင်တို့ရော မိမိရွေးချယ်ခဲ့မှုများသည် မိမိစိတ်ဝိညာဉ်၏ တောင့်တမှု အစစ်မှန်များ ဖြစ်ခဲ့ပါရဲ့လား။ သို့ဆိုလျှင် စိတ်၏ တောင့်တမှု အစစ်မှန်များကိုသာ ရွေးချယ်သင့်ပါသလား။ ထိုသို့ရွေးချယ်ခြင်းသည် ကောင်းခြင်း (သို့) ဆိုးခြင်း ဖြစ်ပါသလား။ မသေချာပါ…

ကျွန်မသည် ကော်ဖီကြိုက်သူ တစ်ယောက် အဖြစ် ရာနှုန်းပြည့် သေချာပါသည်။ မည်သည့် အချိန်၊ မည်သည့်နေရာတွင်မဆို ကော်ဖီကိုသာ ကျွန်မရွေးချယ်ခဲ့ဖူးပါသည်။ မည်သည့် အရပ်သို့ ရောက်နေနေ ထို ကော်ဖီတစ်ခွက် ရှိရာအရပ်သို့ မဖြစ်မနေ သည်းသည်း မည်းမည်း ကျွန်မ ရောက်ရှိခဲ့သည် ချည်းပင်ဖြစ်သည်။ ဆိုလိုသည်မှာ ကျွန်မသည် မိမိ စိတ်ဝိညာဉ်၏ တောင့်တမှု အစစ်မှန်ကိုသာ ရွေးချယ်သူ ဖြစ်ပါသည်။ ကျွန်မသည် မိမိ ကိုယ်ကို လှည့်ဖျားသူတစ်ယောက်မဟုတ်ပါ။ သို့သော် ကျွန်မ ရွေးချယ်မှုများ၏ ကောင်းခြင်း၊ ဆိုးခြင်း များမှာ အသေချာပါ။ မသေချာခြင်းဆိုသည်မှာ ၀ှက်ဖဲမမည်သော ၀ှက်ဖဲတစ်ချက်လည်း ဖြစ်သည်။

စိတ်ဝိညာဉ်၏ တောင့်တမှု အစစ်မှန်တိုင်းသည် စိတ်အာဟာရအား ဖြစ်စေပါသလား (သို့) အကောင်း အဆိုး အဖြေတစ်ခုအား ထုတ်ပေးနိုင်ပါသလား။ ပို၍ပင် မသေချာပါ။ ဘ၀တွင် တိုင်းတာရ အခက်ဆုံးသောအရာသည် အကောင်းနှင့် အဆိုး ဖြစ်သည်ဟု ကျွန်မထင်ပါသည်။ စိတ်၏ တောင်းတမှု တိုင်းသည် ကျွန်မတို့အား ပျော်ရွှင် ချမ်းမြေ့မှုများ ပေးနိုင်ပါခဲ့ရဲ့လား။ တဖျက်ဖျက် တရိပ်ရိပ် တုန်ရင်နေသော၊ ပုံမှန်ထက် အချက်များ စွာ ခုန်နေသော ရင်အစုံ၊ မွမ်းကြပ်မောပန်းမှု များနှင့် များစွာသော ဘေးထွက်နာကျင်မှု များအားလည်း ကျွန်မစွဲလန်းသော ကော်ဖီ တစ်ခွက်က ပေးစွမ်းနိုင်လေသည်။ သို့သော် ကျွန်မစွဲလန်းစွာ တရှိုက်မက်မက် ရွေးချယ်နေဆဲပင် ဖြစ်သည်။ သို့သော် ထိုသို့ နာကျင်ခံစားနေရသော ခဏငယ်တိုင်းတွင် စိတ်၏ တောင့်တရာ ကိုသာ စွဲမြဲ ခိုင်မာစွာ ရွေးချယ်ခဲ့သော ကျွန်မ .. ရွေးချယ်မှု ၊ အကောင်း အဆိုးနှင့် မသေချာခြင်းများ အပေါ်ေ၀၀ါးစွား အဖြေထုတ်နေခဲ့မိပါသည်။ ကျွန်မတို့သည် မည်သို့သော သတ္တ၀ါများနည်း။

ကျွန်မ၏ ရွေးချယ်မှု တိုင်း၌ စိတ်ပျော်ရွှင် သာယာမှု ၁၀ ရာခိုင်နှုန်း နှင့် စိတ်ထိခိုက်ပွန်းပဲ့ နာကျင်မှု ၉၀ ရာခိုင်နှုန်း အချိုးကျစွာ ရောနှောပေါင်းစပ်ထားခဲ့သည် မှန်သော်လည်း ကျွန်မသည် စိတ်၏ တောင့်တရာ အစစ်မှန်ကို သာ ထပ်၍ ရွေးချယ်ဦးမည်မှာ သိပ်ကို သေချာနေခဲ့ပါသည်။ သို့သော် နောင်အနာဂတ် ကျွန်မ၏ ရွေးချယ်မှုများ အတွက် နာကျင်မှုဒဏ် အတောင်အသင့် ခံနိုင်သော စိတ်ပဋိပက္ခအားေ ဖြေရှင်းနိုင်သည့် လုံလောက်သော အဖြေ ကျွန်မ ယခုထိ ရှာဖွေရန် ခဲယဉ်းနေဆဲပင် ဖြစ်သည်။ သေချာသည်မှာတော့ ကော်ဖီသည် ကျွန်မအတွက်တော့ ချည်တိုင်တစ်ခုပင် ဖြစ်နေပါသေးသည်။ သို့သော် ကျွန်မသည် စိတ်၏ တောင့်တရာ အစစ်မှန်ကို သာ ရွေးချယ်ကြပါဟု မည်သူ့ကိုမှ တိုက်တွန်းလိမ့်မည်မဟုတ်သလို ကျွန်မကိုယ်တိုင်တွင်တော့ မိမိစိတ်၏ တောင့်တရာ အစစ်မှန်ကိုသာ ဆက်လက် ရွေးချယ်ဖြစ်နေဖြစ်ဦးမည်မှာ သေချာပါသည်။

လင်းပြာနွေ

သြဂုတ်လ ၇ ရက် ၂၀၀၉

သောကြာနေ့

ည ၈ နာရီ


http://linpyarnway.wordpress.com/